முதல் வாசகம் நமக்கொரு வலிமைமிகு நகர் உண்டு; நம்மைக் காக்க அவர் கொத்தளங்களை அமைத்துள்ளார்; வாயில்களைத் திறந்துவிடுங்கள்; அவர்மீது நம்பிக்கை கொண்ட நேர்மையான மக்களினம் உள்ளே வரட்டும். அவர்கள் மன உறுதி கொண்டவர்கள்; உம்மீது நம்பிக்கை உடையவர்கள்; அவர்களை அமைதியால் நீர் உறுதிப்படுத்துகின்றீர். ஆண்டவர்மீது என்றென்றும் நம்பிக்கை கொள்ளுங்கள்; ஏனெனில், ஆண்டவர், என் ஆண்டவர், என்றும் உள்ள கற்பாறை! உயரத்தில் வாழ்வோரை அவர் தாழ்த்துகின்றார்; வானுற உயர்ந்த நகரைத் தகர்க்கின்றார்; அதைத் தரைமட்டமாக்கி, புழுதியோடு புழுதியாக, மண்ணோடு மண்ணாகச் செய்கின்றார். எளியோரின் காலடிகளும் ஏழைகளின் பாதங்களும் அதை மிதிக்கும். இது ஆண்டவர் வழங்கும் அருள்வாக்கு. 1 ஆண்டவருக்கு நன்றி செலுத்துங்கள், ஏனெனில் அவர் நல்லவர்; என்றென்றும் உள்ளது அவரது பேரன்பு. 19 நீதிமான்கள் செல்லும் வாயில்களை எனக்குத் திறந்துவிடுங்கள்; 25 ஆண்டவரே! மீட்டருளும்! ஆண்டவரே! வெற்றிதாரும்!
மத்தேயு 7:21,24-27
21 என்னை நோக்கி, 'ஆண்டவரே, ஆண்டவரே' எனச் சொல்பவரெல்லாம் விண்ணரசுக்குள் செல்வதில்லை. மாறாக, விண்ணுலகிலுள்ள என் தந்தையின் திருவுளத்தின்படி செயல்படுபவரே செல்வர். 24 ஆகவே, நான் சொல்லும் இவ்வார்த்தைகளைக் கேட்டு இவற்றின்படி செயல்படுகிற எவரும் பாறை மீது தம் வீட்டைக் கட்டிய அறிவாளிக்கு ஒப்பாவார். 25 மழை பெய்தது; ஆறு பெருக்கெடுத்து ஓடியது; பெருங்காற்று வீசியது; அவை அவ்வீட்டின் மேல் மோதியும் அது விழவில்லை. ஏனெனில் பாறையின்மீது அதன் அடித்தளம் இடப்பட்டிருந்தது. 26 நான் சொல்லும் இந்த வார்த்தைகளைக் கேட்டு இவற்றின்படி செயல்படாத எவரும் மணல்மீது தம் வீட்டைக் கட்டிய அறிவிலிக்கு ஒப்பாவார். 27 மழை பெய்தது; ஆறு பெருக்கெடுத்து ஓடியது; பெருங் காற்று வீசியது; அவை அவ்வீட்டைத் தாக்க, அது விழுந்தது; இவ்வாறு பேரழிவு நேர்ந்தது." ------------------------- “தந்தையின் திருவுளப்படி செயல்படுபவரே விண்ணரசுக்குள் செல்வர்”
விண்ணரசை பற்றிய வாசகங்களை வாசிக்கும்போது மீண்டும்மீண்டும் வலியுறுத்தப்படுவது ஒரே கருத்துதான். இறைவனின் விருப்பப்படி நாம் செயல்பட வேண்டும். ஆண்டவர் என்றுமுள்ள கற்பாறை. அவருடைய விருப்பப்படி நடந்தால், அவரின் வார்த்தயை நம் வாழ்வின் ஆதாரமாக கொண்டு அதைக்கடைபிடித்து வாழ்ந்தால், பாறையின் மீது வீடு கட்டிய அறிவாளிக்கு ஒப்பாவோம். வெள்ளத்தை இங்கு பாவநாட்டங்களுடனும் உலக சூழ்நிலைகளுடன் ஒப்பிடலாம். இறைவனோடு ஒன்றி வாழும்போது பாவசூழ்நிலைகள் நம்மை அணுகாது. இறைவன் நம்மை காத்துக்கொள்வார். அவரை விட்டு விலகும்போது பாவசூழ்நிலைகள் நம் வாழ்வை அலைக்கழித்து விண்ணரசின் பாதையில் இருந்து விலகச்செய்கிறது. நாம் இறைவனை முழுமையாக நம்பி வாழும்போது, நம்மை இவ்வுலக துன்பங்கள் தாக்காது. நம்மைச்சுற்றி பலவிதமான கலவரங்கள், பிரச்சனைகள் நடக்கலாம் ஆனால் எதுவும் நம்மை பாதிக்காது. இறைவன் நம்மிடம் எதிர்பார்ப்பது என்ன? மீக்கா 6 : 8 ஓ மானிடா, நல்லது எது என அவர் உனக்குக் காட்டியிருக்கின்றாரே! நேர்மையைக் கடைப்பிடித்தலையும், இரக்கம் கொள்வதில் நாட்டத்தையும் உன் கடவுளுக்கு முன்பாக தாழ்ச்சியோடு நடந்து கொள்வதையும் தவிர வேறு எதை ஆண்டவர் உன்னிடம் கேட்கின்றார்? எரேமியா 9 : 23,24 ஆண்டவர் கூறுவது இதுவே;ஞானி தம் ஞானத்தைக் குறித்துப் பெருமை பாராட்ட வேண்டாம். வலியவர் தம் வலிமையைக் குறித்துப் பெருமை பாராட்ட வேண்டாம். செல்வர் தம் செல்வத்தைக் குறித்துப் பெருமை பாராட்ட வேண்டாம்.பெருமை பாராட்ட விரும்புபவர், "நானே ஆண்டவர்" என்பதை அறிந்து புரிந்து கொள்வதிலும், பேரன்போடும் நீதியோடும் நேர்மையோடும் உலகில் நான் செயலாற்றுகிறேன் என்பதிலும் பெருமை பாராட்டுவாராக! ஏனெனில் இவற்றில் நான் மகிழ்ச்சியடைகிறேன், என்கிறார் ஆண்டவர் இறைவன் வெறுப்பது என்ன? நீதிமொழிகள் 6:17-19அவை இறுமாப்புள்ள பார்வை, பொய்யுரைக்கும் நாவு, குற்றமில்லாரைக் கொல்லும் கை, சதித்திட்டங்களை வகுக்கும் உள்ளம், தீங்கிழைக்க விரைந்தோடும் கால்பொய்யுரைக்கும் போலிச்சான்று, நண்பரிடையே சண்டை மூட்டிவிடும் செயல் என்பவையே. சிந்திப்போம்!! செயல்படுவோம்!! இறைவன் என்றென்றும் வாழ்த்தப்பெறுவாராக!! - பிஃரட்ரிக்
''என்னை நோக்கி, 'ஆண்டவரே, ஆண்டவரே' எனச் சொல்பவரெல்லாம் அன்பார்ந்த இணைதள நண்பர்களே! -- நம் வாயிலிருந்து வெளிப்படுகின்ற வார்த்தைகளுக்கும் நாம் உண்மையாகவே புரிகின்ற செயல்களுக்கும் இடையே பெரிய வேறுபாடு உண்டு. பெரிய சாதனைகளைச் செய்யப் போவதாகச் சொல்வோர் எல்லாம் பெரிய காரியங்களைச் சாதிப்பதுமில்லை, புகழ் பெறுவதும் இல்லை. தாம் செய்யப்போவதாகக் கூறுபவற்றைச் செய்யாமல் வெறும் வாய்ச்சொல் வீரர்களாகவே நின்றுவிடுவோரை நாம் பார்த்திருக்கிறோம். எது நல்லது என நம் உள்ளத்தின் ஆழத்தில் உணர்கின்றோமோ அதைச் செய்வதும் அந்த உறுதிப்பாட்டின் அடிப்படையில் செயல்படுவதும் மனிதருக்கு அழகு. இதையே இயேசு நமக்கு நினைவுபடுத்துகிறார். இயேசு கடவுளின் முழு வெளிப்பாடாக நம்மிடையே வந்தார். அவரை நாம் ''ஆண்டவர்'' என ஏற்கிறோம். ஆனால் இயேசு நம் ஆண்டவர் என்றால் அவர் எந்த விழுமியங்களுக்காக வாழ்ந்தாரோ, எந்த மதிப்பீடுகளுக்காக இறந்தாரோ அந்த விழுமியங்களையும் மதிப்பீடுகளையும் நம் வாழ்வில் எதார்த்தமாக்கிட நாம் முன்வரவேண்டும். இயேசு தம் தந்தைக் கடவுளின் விருப்பத்தை நிறைவேற்றுவதில் முனைந்து செயல்பட்டார். அதுபோல நாமும் செயல்படவேண்டும். -- இறையாட்சியில் பங்கேற்க விரும்புவோர் வெறும் வாய்ச்சொல் வீரராக மட்டுமே இருந்தால் போதாது. நம் சொல்லும் செயலும் இயேசுவின் மதிப்பீடுகளுக்கு இசைய அமையும்போது நாம் உண்மையிலேயே கடவுளின் விருப்பப்படி நடக்கின்றோம் எனலாம். அன்றாட வாழ்வில் நாம் மொழியைப் பயன்படுத்தி நம் உறவுகளை வெளிப்படுத்துகின்றோம். அதுபோலவே, கடவுளோடு நமக்குள்ள உறவை வெளிப்படுத்தவும் நாம் மொழியைக் கையாளுகின்றோம். மொழி என்பது நம் நாவிலிருந்து உதிர்கின்ற சொல் மட்டுமல்ல. வாய்ச்சொல்லாக வடிவெடுக்கும் முன்னரே மொழி என்பது நம் உள்ளத்தில் உருவெடுக்கின்றது. உள்ளத்தில் எழுகின்ற நல்ல சிந்தனைகளை நம் மொழி எதிரொளிக்க வேண்டும்; அச்சிந்தனைகளின் குரலை எதிரொலிக்க வேண்டும். அப்போது நம் சொல்லும் நல்லதாக இருக்கும், அச்சொல்லில் அடங்கிய பொருளும் வெளியே துலங்கும். நம் சொல்லுக்குப் பொருந்துகின்ற விதத்தில் நம் செயலும் அமைந்தால் அதுவே நம் ஆழ்ந்த மனிதப் பண்பை வெளிப்படுத்துகின்ற ஒளியாக மாறும். எனவே, நம் தலைவரும் வழிகாட்டியுமாகிய இயேசுவை நோக்கி, ''ஆண்டவரே, ஆண்டவரே'' என்று சொல்வதோடு நிறுத்திக் கொள்ளாமல், ''நம் விண்ணகத் தந்தையின் திருவுளப்படி செயல்பட'' நாம் முனைந்திட வேண்டும். அப்போது ''விண்ணரசில் புகுந்திடும்'' பேறு நமக்கு வழங்கப்படும். மன்றாட்டு
--அருட்திரு பவுல் லியோன் வறுவேல் |