முதல் வாசகம் மத்தேயு 13:31-35 பொதுக்காலம் 17 வாரம் திங்கள்
நற்செய்தி வாசகம் ------------------------ கடுகு, புளிப்பு மாவு : தைரியம் தரும் தைலங்கள் மனிதர்களுக்கான பல பிரச்சினைகளில் தாழ்வு மனப்பான்மை என்பது மிகவும் குறிப்பிடத்தக்கது. தாழ்வு மனப்பான்மை என்பது நான் சிறியவன், சிறந்தவன் அல்ல என்பதிலிருந்து உதயமாகிறது. இந்த தாழ்வு மனப்பான்மை கொண்டவர்களுக்கு தைரியம் கொடுக்கும் தைலமாக வருகிறது இன்றைய நற்செய்தி வாசகம். கடுகு உருவில் சிறியது ஆனால் சிறந்தது என்பதை தன் வாழ்க்கையில் எடுத்துக் காட்டுகின்றது. கடுகு தனக்குள்ளே இருக்கும் சக்தியை உணா்ந்ததால் வானத்துப் பறவைகள் தங்கும் அளவுக்கு தன்னுடைய பிரம்மாண்டமான சக்தியை அந்த சிறிய விதை வெளிக்கொணர்கின்றது. புளிப்பு மாவு கண்ணுக்கு புலப்படாதது. ஆனால் சிறந்தது என்பதை தன் வாழ்க்கையில் எடுத்துக் காட்டுகின்றது. மாவு முழுவதையும் புளிப்பேற்றும் தன்னுடைய பிரம்மாண்டமான சக்தியை வெளிப்படுத்துகின்றது. நமக்குள்ளே கடவுள் கொடுத்த பிரம்மாண்டமான சக்தி இருக்கிறது. அதை கண்டுபிடிப்போம். அதை உசுப்பிவிடுவோம். மிகவும் சிறியவைகள் இப்படி செய்கிறது என்றால் ஏன் நம்மால் செய்ய முடியாது? எல்லாமே முடியும். நம்மை ஆட்டிப்படைக்கும் தாழ்வு மனப்பான்மையை தரை மட்டமாக்குவோம். தரணி எங்கும் நம் ஆற்றலை பரப்பி விடுவோம். மனதில் கேட்க… மனதில் பதிக்க… எரேமியா 13: 1 – 11 தவறான நடத்தை ஒருவரை அழிவுக்கு அழைத்துச் செல்லும் என்பதை, இன்றைய வாசகம் நமக்குக் கற்றுக்கொடுக்கிறது. கடவுள் இஸ்ரயேல் மக்களை தன் சொந்த மக்களாக தேர்ந்தெடுத்திருக்கிறார். அவர்களை கண்ணும் கருத்துமாக வளர்த்தெடுக்கிறார். அவர்கள் வழியாக இந்த உலகத்திற்கு மீட்பு கொண்டு வர வேண்டும் என்பதே, இறைத்தந்தையின் விருப்பமாக இருக்கிறது. தன்னுடைய எண்ணம் நிறைவேறுவதற்கு இஸ்ரயேல் மக்களின் ஒத்துழைப்பு அவசியமானதாக இருக்கிறது. அவர்களும் கடவுளுக்கு பிரமாணிக்கமாக இருக்கிறார்கள். ஆனால், நாட்கள் செல்ல செல்ல, அவர்களது வாழ்க்கையில் மாற்றம் ஏற்பட தொடங்குகிறது. கடவுள் பயம் அவர்களிடத்தில் குறையத் தொடங்குகிறது. கடவுள் பயம் என்பது கடவுளைப் பார்த்து பயப்பட வேண்டும் என்கிற எண்ணமல்ல. மாறாக, அவருடைய கட்டளைகளுக்குக் கீழ்ப்படிந்து நடக்கிற செயல்பாடு. கடவுள் பொறுமையாக இருக்கிறார். எப்படியும் அவர்கள் தன்னிடத்தில் திரும்பி வருவார்கள் என்கிற எதிர்பார்ப்போடு இருக்கிறார். ஆனால், அவர்கள் கடவுளை விட்டு வெகுதூரம் சென்று கொண்டிருக்கிறார்கள். கடவுள் அவர்களுக்கு பாடம் கற்பிக்க வேண்டும் என்று நினைக்கிறார். எனவே, அவர்களுக்கு நடக்க இருப்பதை, காட்சி வழியாக, இறைவாக்கினருக்கு விளக்கி, இஸ்ரயேல் மக்களுக்கு அறிவிக்கச் செய்கிறார். இது இஸ்ரயேல் மக்களுக்கு தண்டனை கொடுக்க வேண்டும் என்பதற்காக அல்ல, மாறாக, அப்படியாவது அவர்கள் திருந்தி, தன்னிடம் திரும்பி வர மாட்டார்களா? என்பதற்காகத்தான். தான் இஸ்ரயேல் மக்கள் மீது வைத்திருந்த எதிர்பார்ப்பையும், அவா்கள் வேற்றுத்தெய்வங்களை நாடிச்சென்றதையும் அவர் எடுத்துரைக்கிறார். அதற்காக வருத்தப்படுகிறார். அவர்களை தன்னிடத்தில் திரும்பி வருவதற்கு அழைப்புவிடுக்கிறார். இறைவன் எப்போதும் அவருடைய பிள்ளைகளாக இருக்க வேண்டும் என்று நினைக்கிறார். அவருடைய கட்டளைகளுக்கு கீழ்ப்படிந்து நடக்க வேண்டும் என்று விரும்புகிறார். இறைவன் நம் மீது காட்டும் அன்புக்கு, குறைந்தபட்சம், அவருடைய கட்டளைகளை மதித்து நடப்பதற்கு நாம் முயற்சி எடுக்க வேண்டும். அவரது வழியில் நடப்பதற்கு நாம் முனைப்புகாட்டுவோம்.
புளிப்பு மாவு இயேசுவின் மிகப்பெரிய பலமாகச் சொல்லப்படுவது, அவருடைய எளியநடை மற்றும் எளிய கருத்துக்கள். அதிலும் சிறப்பாக மக்கள் வாழ்க்கை நிலையோடு இணைந்து செல்லக்கூடிய உருவகங்களைப் பயன்படுத்தி, அவர் வெளிப்படுத்தும் கருத்தாழமிக்கச் சிந்தனைகள் மக்கள் மனதில் ஆழமாகப் பதிந்திருந்தது. உதாரணமாக, விதைப்பவர் உவமையை விவசாயின் வாழ்க்கையிலிருந்து எடுத்துச்சொல்கிறார். அவர்கள் அன்றாடம் தாங்கக்கூடிய வேதனையை, களைகள் உவமையில் எடுத்துக்காட்டுகிறார். மீனவர்கள் அதிகம் வாழக்கூடிய பகுதிகளில் வலை உவமையை எடுத்துரைக்கிறார். வணிகர்கள் மத்தியில் பரவலாகப் பேசப்படுகின்ற முத்தைப்பற்றி, முத்து உவமையில் பேசுகிறார். அந்த வரிசையில், மக்களின் அன்றாட உணவான அதிலும் குறிப்பாக சாதாரண மக்களின் உணவுமுறையான புளிப்பு மாவையும், இறையாட்சிக் கருத்துக்களை வெளிப்படுத்த பயன்படுத்துகிறார். யூதர்கள் புளிப்புத்தன்மையை தீயதாகப்பார்த்தனர். மத்தேயு 16: 6 ல் இயேசு பரிசேயரையும், சதுசேயரையும் புளிப்பு மாவுக்கு ஒப்பிடுகிறார். அவர்களிடத்தில் கவனமாக இருப்பதற்கு எச்சரிக்கை விடுக்கிறார். இத்தகைய புளிப்பு மாவை இயேசு இறையாட்சியோடு ஒப்பிடுவது உண்மையில் பலருக்கு இடறலாக, கோபமாக இருந்திருக்கலாம். புனிதமானது என்று கருதப்படும் இறையாட்சியை, தீயது என்று சொல்லப்படும் புளிப்பு மாவோடு இயேசு எப்படி ஒப்பிடலாம்? என்பதுதான் அவர்கள் உள்ளத்தில் கேள்வியாக எழுந்திருக்கும். ஆனால், இயேசு இங்கே சொல்ல வருவது, புளிப்புத்தன்மை மாவு முழுவதையும் புளிப்பாக்கிவிடுகிறது. மாவு முழுவதின் தன்மையையும் மாற்றிவிடுகிறது. அதே போல, இறையரசின் வருகை நமது வாழ்வை முற்றிலுமாக மாற்ற வேண்டும். இன்றைக்கு கிறிஸ்து இயேசுவில் நாம் வாழக்கூடிய நமது வாழ்வு, மற்றவர்களின் வாழ்வை புரட்டிப்போடுகின்ற அளவுக்கு மாற்றம் பெறத்தக்க வகையில் வாழப்பட வேண்டும். அதுதான் உண்மையான கிறிஸ்தவ வாழ்வு. எத்தகைய காரணத்தைக்கொண்டும், மற்றவர்களுக்கு இடறலான வாழ்வாக அமையக்கூடாது.
உண்மையும், பிரமாணிக்கமும் உள்ளவர்களாக……. இஸ்ரயேல் மக்கள் மத்தியில் மோசே மிகப்பெரிய இறைவாக்கினராகக் கருதப்பட்டார். அவருக்கு மக்கள் மத்தியில் அதிக செல்வாக்கு இருந்தது. மத்தேயு நற்செய்தியாளர் இயேசுவைப் புதிய மோசேயாக அறிமுகப்படுத்துவதை அவருடைய நற்செய்தியில் நரம் பார்க்கலாம். மோசேயின் குழந்தைப்பருவ நிகழ்ச்சிகளை இயேசுவின் குழந்தைப் பருவ நிகழ்ச்சிகளோடு ஒப்பிடுவதிலும் சரி, பத்து கொள்ளை நோய்களுக்கு மாற்றாக, இயேசு செய்த அற்புதங்களும் சரி, இயேசு “புதிய மோசே“ என்ற சிந்தனையை, மத்தேயு நற்செய்தியாளர் ஆணித்தரமாகத் தருகிறார். இந்த வரிசையில் பழைய ஏற்பாட்டை முழுமையாக்கவும், நிறைவேற்ற வந்தவராகவும் இயேசுவை அவர் சித்தரிக்கிறார். எனவே தான் மத்தேயு நற்செய்தியில் “இவ்வாறு மறைநூல் வாக்கு நிறைவேறியது” என்ற சொல்லாடல் அதிகமாகப் பயன்படுத்தப்பட்டிருக்கிறது. பழைய ஏற்பாட்டில் இறைவாக்கினர்களால் முன்சொல்லப்பட்டதை இயேசு எவ்வாறு நிறைவேற்றுகிறார் என்ற பாணியில், மத்தேயு நற்செய்தியாளர் உண்மையில் அதிக சிரத்தை எடுத்து தனது நற்செய்தியை எழுதியிருக்கிறார். மத்தேயுவின் இந்த நற்செய்தி நமக்கு தரும் செய்தி, கடவுள் தனது வாக்குறுதியை நிறைவேற்றுகின்ற கடவுளாக இருக்கிறார் என்பதுதான். கடவுள் தான் இறைவாக்கினர் வாயிலாகச் சொன்ன ஒவ்வொரு வார்த்தைகளையும் காலம் கனிகிறபோது நிறைவேற்றுகிறார். இறைவன் வாக்குறுதி மாறாதவர். அவர் தான் கொடுத்த வாக்குறுதிகளுக்கு பிரமாணிக்கமும், உண்மையும் உள்ளவராய் இருக்கிறார். அந்த வகையில் நாம் எந்த அளவுக்கு கடவுளிடம் கொடுத்த வாக்குறுதிகளுக்கு பிரமாணிக்கத்தோடு நடக்கிறோம் என சிந்திப்போம். எத்தனையோ வாக்குறுதிகளை கடவுளின் திருமுன்னிலையில் கொடுக்கிற நாம் அதற்கு உண்மையாக நடக்கிறோமா? சிந்திப்போம்.
-------------------------------------------------------- நார்ப்பட்டுக் கச்சையின் அடையாளம் ! இயேசுவில் இனிய இணைய தள அன்பர்களே, இன்றைய முதல் வாசகத்தில் இறைவாக்கினர் எரேமியாவை அடையாள முறையில் இறைவாக்குரைக்கப் பணிக்கிறார் ஆண்டவர். இஸ்ரயேல் மக்கள் ஆண்டவரோடு ஒன்றித்து வாழ்ந்தவரை, நலமோடும் வளமோடும் வாழ்ந்தார்கள். ஆனால், இறைவனைவிட்டுப் பிரிந்து, பேராத்து (யூப்ரடீஸ்) ஆற்றின்கரை வரை புலம் பெயர்ந்து, பிற இனத்தாரின் பழக்கவழக்கங்களை ஏற்று, அவர்களின் தெய்வங்களை வழிபடத் தொடங்கினர். எனவே, எரேமியா ஓர் அடையாளச் செயலைச் செய்கிறார். நார்ப்பட்டுக் கச்சை ஒன்றைச் செய்து, அதனை யூப்ரடீஸ் ஆற்றின் படுகையில் புதைத்து வைக்கிறார். சில நாள்கள் கழித்து, அதனை மீண்டும் எடுத்துப் பார்த்தபோது, அது ஒன்றுக்கும் உதவாத வகையில் இற்றுப்போயிருந்தது. இஸ்ரயேல் மக்களும் இவ்வாறே இற்றுப்போயினர் என்கிறார் ஆண்டவர். நமது வாழ்விலும் நாம் நவீன உலகின் ஆடம்பரங்கள், கலாசாரத்தில் மூழ்கி இறைவனை மறந்தால், நாமும் இற்றுப்போய்விடுவோம் என்று எச்சரிக்கிறார் எரேமியா. கவனமுடன் செவிமடுப்போம். மன்றாடுவோம்: எங்களை உமது கச்சை போல அழகுபடுத்தும் இறைவா, உம்மைப் போற்றுகிறோம். உம்மை விட்டுப் பிரிந்து, நாங்கள் இற்றுப்போகாதபடி உமது வார்த்தையாலும், திருவிருந்தாலும் எங்களை வலிமைப்படுத்துவீராக. உமக்கே புகழ், உமக்கே நன்றி, உமக்கே மாட்சி, ஆமென். -- அருட்தந்தை குமார்ராஜா கடுகு விதையும், புளிப்பு மாவும் ! இயேசுவில் இனிய இணைய தள அன்பர்களே, இந்த உலகில் என்னால் எந்த மாற்றமும் செய்ய முடியாது என்ற சலிப்போ, விரக்தியோ உங்களுக்கு எப்போதேனும் ஏற்பட்டதுண்டா? வாருங்கள், ஆறுதல் கொள்வோம். நமக்காகத்தான் இயேசு இந்த உவமையைச் சொல்லியிருக்கிறார். கடுகு விதை எவ்வளவு சிறியது. ஆனாலும், அது வளர்ந்து பெரிய மரமாகிறது. வானத்துப் பறவைகளுக்கு நிழல் தருகிறது. புளிப்பு மாவின் அளவு சிறியது. இருப்பினும், மாவு முழுவதையும் அது புளிப்பேற்றுகிறது. அதுபோலத்தான், ஒவ்வொரு சிறிய செயலும், ஒவ்வொரு சிறிய சொல்லும். அவை மௌனமாக இந்த உலகின்மீது தாக்கத்தை ஏற்படுத்துகின்றன. நாமும் அப்படித்தான். ஒவ்வொரு சிறிய செயல், ஒரு புன்னகை, ஒரு பாராட்டு வார்த்தை, ஒரு அன்பான தொடுதல்... இவற்றின் வழியாக ஒரு சில மனிதர்களின் வாழ்வைத் தொட முயற்சிப்போம். இறுதியில், ஏராளமான மனிதர்கள் தொடப்படுவார்கள். இந்த உலகம் இறைவன் வாழும் இனிய பூமியாக மாறும். இன்றைய நாளில் ஒரு சிறிய முயற்சி எடுப்போமா? மன்றாடுவோம்; இறையாட்சியின் வேந்தனே இயேசுவே, உம்மைப் போற்றுகிறேன். இந்த நாளை ஆசிர்வதித்துத் தாரும். இந்த நாள் முழுவதும் எனது ஒவ்வொரு செயலும், சொல்லும், புன்னகையும், ஊக்க மொழிகளும் இந்த உலகிற்கு விண்ணரசின் மதிப்பீடுகளை அறிவிக்கட்டும். நானும் ஒரு நற்செய்தியாளனாக இன்று முழுவதும் வாழ்வேனாக. உமக்கே புகழ், உமக்கே நன்றி, உமக்கே மாட்சி, ஆமென். -- அருட்தந்தை குமார்ராஜா ''இயேசு, 'ஒருவர் கடுகு விதையை எடுத்துத் தம் வயலில் விதைத்தார்... அன்பார்ந்த இணையதள நண்பர்களே! -- இறையாட்சி என்றால் என்னவென்பதை மக்களுக்கு விளக்கிக் கூற இயேசு பயன்படுத்திய ஓர் உருவகம் கடுகு விதை ஆகும். சிறியதொரு கடுகு விதை பெரியதொரு மரமாக வளர்ந்து ஓங்கும் எனவும் இறையாட்சியும் அவ்வாறே சிறிய அளவில் தொடங்கி மாபெரும் அரசாக உருப்பெறும் எனவும் இந்த உவமைக்குப் பொதுவாக விளக்கம் தரப்படுவதுண்டு. ஆனால் இயேசுவின் உவமைகளில் எதிர்பாராத திருப்பங்கள் வரும் என்பதைக் கருத்தில் கொண்டு இந்த உவமையைப் புரிந்துகொள்ள வேண்டும் என அறிஞர் கூறுவர். இந்த உவமையின் பின்னணி பழைய ஏற்பாட்டில் உள்ளது. அங்கே எசேக்கியேல் இறைவாக்கினர் வானளாவ வளர்கின்ற கேதுரு மரம் பற்றிப் பேசுகிறார் (காண்க: எசே 17; 31). அதுபோலவே தானியேல் நூலிலும் மிக உயர்ந்து வளர்ந்த வலிமை மிக்க மரம் பற்றிப் பேசப்படுகிறது (காண்க: தானி 4:10-15). மிக உயர்ந்து வளர்ந்த அந்த மரங்களைப் போல கடுகுச் செடி ஒருநாளும் வளர இயலாது. இறையாட்சியைப் புகழ்மிக்க கேதுரு மரத்திற்கு ஒப்பிடாமல் மிகச் சாதாரணமான தோட்டப் பயிரான கடுகுச் செடிக்கு இயேசு ஒப்பிடுகிறார். இது வலிமை மிக்கதோ வானளாவ உயர்வதோ அல்ல. ஆனால் இயேசுவில் நம்பிக்கை கொள்வோரின் வாழ்வில் அதிசயமான மாற்றம் நிகழும். அவர்கள் ஒரு புதிய நிலைக்கு உயர்த்தப்படுவார்கள். இந்த மாபெரும் மாற்றம் நம்மில் நிகழ வேண்டும் என்றால் நாம் இயேசுவிடத்தில் முழுமையான நம்பிக்கை கொண்ட மக்களாக வாழ்ந்திட வேண்டும். அப்போது நிகழ இயலாததும் நிகழும். சிறிய கடுகு விதையை மாபெரும் மரமாக வளர்ந்திடச் செய்யவும் கடவுளுக்கு வல்லமை உண்டு! -- மேலும், கடுகுச் செடி கேதுரு மரம் போல வானத்தை நோக்கி நேராக வளர்வதல்ல. மாறாக, அதன் கிளைகள் இங்கும் அங்குமாகப் பல திசைகளில் வளர்ந்து செல்லும். பிற செடிகளின் ஊடேயும் நுழைந்து வளரும். தொடக்க காலத் திருச்சபையில் பிற இனத்தார் பலர் இயேசுவில் நம்பிக்கை கொண்டு, யூத கிறிஸ்தவர்களோடு சேர்ந்து வளர்ந்த செயல்பாடு இந்த உவமையில் உருவகமாக வெளிப்படுகிறது. மன்றாட்டு --அருட்திரு பவுல் லியோன் வறுவேல்
"உவமைகள் இன்றி அவர் அவர்களோடு எதையும் பேசவில்லை" (மத்தேயு 13:34) அன்பார்ந்த இணையதள நண்பர்களே! -- இயேசு மக்களுக்கு வழங்கிய போதனையில் பெரும்பகுதி உவமைகள் வழியாகவே வழங்கப்பட்டது என்பது உண்மை. மத்தேயு, மாற்கு, லூக்கா ஆகிய முதல் மூன்று நற்செய்தி நூல்களிலும் இயேசு கூறிய உவமைகள் பல அடங்கியுள்ளன. உவமைக்கும் கதைக்கும் இடையே சில ஒற்றுமைகளை நாம் காணலாம். ஆயினும் அவற்றிற்கிடையே பல வேற்றுமைகளும் உண்டு. இயேசு கூறிய உவமைகள் மக்களை மகிழ்விப்பதற்காகக் கூறப்பட்ட கட்டுக் கதைகளோ, கற்பனைச் சித்திரங்களோ அல்ல. இயேசுவின் உவமைகள் கடவுளாட்சி இவ்வுலகில் வருவது பற்றியும் அந்த ஆட்சியின் தன்மை பற்றியும் அமைந்திருந்தன. அன்றாட வாழ்க்கையில் மக்கள் சந்திக்கின்ற நிகழ்ச்சிகளை இயேசு கதையாக எடுத்துச் சொல்லி, அவற்றின் வழியாக மக்களுக்கு இறையாட்சி பற்றிய உண்மைகளை உணர்த்தினார். எனவே, இயேசுவின் உவமைகளைக் கேட்ட மனிதர்களை இயேசு சிந்திக்கத் தூண்டினார். கருத்தளவிலான உண்மைகளை வாழ்க்கையோடு எவ்விதத் தொடர்புமின்றி எடுத்துக் கூறுவதன்று இயேசுவின் பாணி. அவர் மக்களின் வாழ்க்கையைத் தொடுகின்ற விதத்தில், அவர்கள் எளிதாகக் கண்டுகொள்கின்ற ஆள், இடம், பொருள் போன்றவற்றை உள்ளடக்கிய கதைகளை எடுத்துச் சொன்னார். இயேசு சொன்ன உவமைகளில் சிறப்பு மிக்கவை பல உண்டு. எடுத்துக்காட்டாக, "நல்ல சமாரியர்", "காணாமற்போன மகன்" போன்ற உவமைகளைக் கூறலாம். -- இயேசுவின் போதனைகளில் மட்டும்தான் உவமைகள் உண்டு என்பது சரியல்ல. இயேசு புரிந்த அரும் செயல்களும் உவமைகளாக மாறின. எடுத்துக்காட்டாக, இயேசு தண்ணீரை இரசமாக மாற்றிய நிகழ்ச்சியை நம்முடைய பகுத்தறிவால் விளக்கமுடியாத ஒரு அதிசயச் செயலாக மட்டுமே பார்த்தால் அச்செயலின் உட்பொருளைக் காண நாம் தவறிவிடுவோம். யூதரின் தூய்மைச் சடங்குகளுக்குத் தேவையான கல் தொட்டிகளைத் தண்ணீரால் நிரப்பி அத்தண்ணீரை இயேசு சுவையான இரசமாக்கினார். பழையன கழிந்து புதியன பிறக்கும் காலம் வந்துவிட்டது என இயேசு இச்செயல் வழியாக அறிவித்தார். இயேசுவின் வருகையால், அவருடைய போதனை மற்றும் செயல்களால் கடவுளின் ஆட்சி என்னும் புதுமை இவ்வுலகில் வரத் தொடங்கிவிட்டது என இச்செயல் காட்டுகிறது. எனவே, உவமைகள் இயேசுவின் சொல் மற்றும் செயல்களில் வெளிப்பட்டன எனலாம். இன்னும் துல்லியமாகப் பார்த்தால் இயேசுவே "கடவுளின் உவமை" என்றுகூட நாம் சொல்லலாம். அதாவது இயேசுவைப் புறக்கண்களால் மட்டுமே பார்த்தவர்கள் அவரிடத்தில் கடவுளின் வல்லமை துலங்கியதை உணரவில்லை. ஆனால், தம் அகக்கண்களைத் திறந்து, இதயக் கதவுகளை அடைத்து மூடாமல் இயேசுவை அணுகிய மக்கள் இயேசுவின் சொற்களிலும் செயல்களிலும் கடவுளின் உடனிருப்பைக் கண்டுகொண்டார்கள். அவர்கள்தான் இயேசுவை உண்மையாகவே "நம்பியவர்கள்". இவ்வாறு நம்பிக்கை கொள்ள இயேசு இன்று நம்மை அழைக்கிறார். நம்பிக்கையோடு இயேசுவை அணுகுவோர் கடவுளின் உவமையாகிய இயேசுவை அடையாளம் காண்பதோடு, அவரை நம் மீட்பராக நமக்களித்த தந்தையாம் கடவுளையும் நம்மோடு குடிகொண்டு நம்மை வழிநடத்தும் தூய ஆவியையும் அடையாளம் கண்டு, வாழ்க்கையில் அனுபவித்து உணர்வர். மன்றாட்டு --அருட்திரு பவுல் லியோன் வறுவேல்; விசுவாசமே நமது வலிமை அன்பார்ந்த இணையதள நண்பர்களே! ஒரு பெரிய காட்டைச் சுத்தம் செய்ய வெண்டும். அதில் நிறைய முட்செடிகள், புதர்கள்,குப்பைகள். "வாங்க, இவை எல்லாவற்றையும் எரிக்க சிவகாசியில் போய் நான்கு லாரி தீக்குச்சி வாங்கிவருவோம். பெரிய காடு அல்லவா, நிறைய தீக்குச்சி வேண்டுமல்லவா!" என்றேன். எல்லோரும் சிரித்தார்கள். --அருட்திரு ஜோசப் லீயோன் |