இயேசுவின் திருஇதயம் பெருவிழா முதல் வாசகம் யோவான் 19:31-37 இயேசுவின் திரு இருதயம்
நற்செய்தி வாசகம் ------------------------- ஓசேயா 11: 1, 3 – 4, 8 – 9 முற்காலத்தில் பாரசீகம் மற்றும் கிரேக்க நாடுகள் அவ்வப்போது, கடுமையான போர்களில், ஒருவருக்கு எதிராக ஈடுபட்டனர். எண்ணிக்கையில் குறைவாக இருந்தாலும், கிரேக்க வீரர்களே எப்போதும் வெற்றி பெற்றனர். இதுஎப்படி சாத்தியம்? பாரசீக வீரர்களில் பெரும்பாலானவர்கள் அடிமைகள். அந்த போரில் ஈடுபடும்படி கடுமையாக சித்ரவதை செய்யப்பட்டனர். வேறு வழியில்லாமல் அந்த போரில் அவர்கள் ஈடுபட்டனர். ஆனால், கிரேக்க வீரர்களோ தங்கள் நாட்டிற்காக, தங்கள் நாட்டு மக்களை காப்பாற்றுகிறோம் என்கிற, உணர்வோடு போரிட்டனர். எனவே தான், எண்ணிக்கையில் குறைவாக இருந்தாலும், அவர்கள் வெற்றி பெற்றனர். தங்கள் தாய்நாட்டின் மீது கொண்டிருந்த பாசம், அந்த போரில் எப்படியும் வெற்றி பெற்று தங்கள் நாட்டு மக்களை காப்பாற்ற வேண்டும் என்கிற எண்ணத்தை அவர்களுக்குள் ஏற்படுத்தியது. இந்த உவமையை நாம் இஸ்ரயேல் மக்களுக்கும், கடவுளுக்கும் இடையேயான உறவிற்கு பொருத்திப் பார்க்கலாம். கடவுள் தன்னை இஸ்ரயேல் மக்களோடு அன்புறவில் இணைத்திருக்கிறார். இஸ்ரயேல் குழந்தையாக இருந்தபோதே, இறைவன் அவர்களை அன்பு செய்தார். குழந்தையாக என்று சொல்வது, இஸ்ரயேல் மக்களின் தொடக்கநிலையைக் குறிக்கிறது. நாடில்லாமல், நாடோடிகளாய் வாழ்ந்த அந்த நிலைதான் இஸ்ரயேல் மக்களின் தொடக்கநிலை. அந்த குழந்தையை எகிப்தின் அடிமைத்தனத்திலிருந்து விடுதலை கொடுத்து, நடைபயிற்றுவித்தது கடவுள். அவர்கள் காயம்பட்டபோதெல்லாம், மருந்திட்டு குணப்படுத்தியது இறைவன். ஆனாலும், இஸ்ரயேல் மக்கள் கடவுளை உதறித்தள்ளிவிட்டார்களே என்று, அவர்கள் மீது கடவுள் வேதனைப்படுவதை இறைவாக்கினர் இங்கே படம்பிடித்துக் காட்டுகிறார். இஸ்ரயேல் கடவுளின் செல்லக்குழந்தை என்பதால், தவறு செய்தாலும் தன்னுடைய கோபத்தைக் காட்ட மாட்டேன் என்று, ஆண்டவர் கூறுகிறார். இறைவனின் அதிகப்படியான அன்பை வெளிப்படுத்தும் பகுதியாக இது இருப்பதை நாம் பார்க்கிறோம். தவறுகளை மன்னிக்கின்ற தாராள குணத்தை நாம் பார்க்கிறோம். இறைவனுடைய இரக்கம் நமக்கு எப்போதும் இருக்கிறது என்பதை, இறைவாக்கினர் நம்முடைய வாழ்வின் செய்தியாக தருகிறார். இறைவனைப் பார்த்து நாம் பயப்பட வேண்டியதில்லை. தாயின் அன்பை உணர்ந்திருக்கிற குழந்தை தாயைப் பார்த்து பயப்பட தேவையில்லை. அதேபோல, இறைவனின் அன்பை உணர்ந்திருக்கிற நாம், கடவுளைப் பார்த்து பயப்படத்தேவையில்லை.
------------------------------------------------------ இயேசுவின் திரு இருதயப்பெருவிழா இயேசுவின் திரு உடல், திரு இரத்தப்பெருவிழாவிற்குப் பிறகு வரக்கூடிய வெள்ளிக்கிழமையில், இந்த திருவிழா கொண்டாடப்படுகிறது. இதயம் என்பது அன்பின் அடையாளம். கடவுள் நம் அனைவர் மேலும் கொண்டிருக்கக்கூடிய அன்பின் அடையாளம் தான் இயேசுவின் திரு இதயம். அந்த அன்பு இயேசுவின் பாஸ்கா மறைநிகழ்ச்சியில் வெளிப்பட்டதை, இந்த திருவிழா நமக்குக்கூறுகிறது. சிலுவையில் குத்தித்திறக்கப்பட்ட திருவிலாக்காயத்தையும், அவரது பாடுகளையும் குறிக்கும் வண்ணம், திருஇதயத்தில் ஒரு காயமும், அதற்கு சற்றுமேலே முள்முடியும், அதன்மேல் திருச்சிலுவையும் காணப்படுகிறது. திரு இதயத்தின் மேல் பற்றியெரியும் தீச்சுடர், இயேசுகிறிஸ்து நம்மேல் கொண்டிருக்கிற அதிகமான அன்பைக்குறிப்பதாகும். திரு இதய ஆண்டவர் பக்திமுயற்சி 13 மற்றும் 14 நூற்றாண்டுகளில் பரவத்தொடங்கியது. பிரான்ஸ் நாட்டில் உள்ள பாரே-லி-மோனியால் என்ற இடத்தில் வாழ்ந்த விசிட்டேஷன் துறவற சபையைச்சேர்ந்த அருட்சகோதரி மார்கரெட் மேரி என்பவர் 1673 முதல் 1675 வரை கண்ட, பல தெய்வீக காட்சிகளாகும். இந்தக்காட்சிகளில் ஆண்டவர் இயேசு, திரு இருதய விழாவை, திருவுடல் திரு இரத்தப்பெருவிழாவிற்குப் பிறகு உள்ள வெள்ளிக்கிழமையில் அறிமுகப்படுத்த, காட்சியில் சொன்னார். திருத்தந்தை 13 ம் கிளமெண்ட் இதை 1765 ல் அங்கீகரித்தார். 1865 ல் திருத்தந்தை ஒன்பதாம் பயஸ் இவ்விழாவினை கட்டாய விழாவாக திருச்சபை முழுவதும் அறிமுகப்படுத்தினார். இறைவனுடைய அன்பை நாம் முழுவதுமாக உணர வேண்டும் என்பதுதான் இந்த விழா நமக்கு உணர்த்தும் செய்தியாகும். இயேசுவின் அன்பு நிறைவான அன்பு. நம்மேல் அதிகமான இரக்கம் காட்டுகிற அன்பு. இயேசுவின் திரு இதயத்திடம் நம்மையே கையளிப்போம். மகிழ்வோடு வாழ்வோம்.
-------------------------------------------------------- இயேசுவின் இதயம் பரிவின் ஊற்று இதயம் அன்பின் அடையாளம். எனவேதான், இயேசுவும் தமது இதயத்தை அவரது அன்பின் அடையாளமாக நமக்கு வெளிப்படுத்தியிருக்கிறார். புனித மார்கரட் மரியம்மாளுக்கு காட்சி தந்த இயேசு, அன்பினால் பற்றி எரிந்த தமது இதயத்தைக் காட்டி, மனுக்குலத்தின் மட்டில் தமது பரிவை, கனிவை உறுதிப்படுத்தினார். மனிதர்கள் மூளை, இதயம் என இரு தளங்களில் செயல்படுகிறோம், செயல்பட வேண்டும். மூளை என்பது அறிவுத் தளத்தைக் குறிக்கின்றது. எதையும் பகுத்தறிவோடு, காரண, காரியங்களோடு அணுகி, சிக்கல் தீர்க்கும், சிந்திக்கும் திறனைக் காட்டுகிறது. அறிவாற்றலோடு நமது பணிகள் திகழவேண்டும். அதே வேளையில், இதயம் உணர்வுத் தளத்தைக் குறிக்கின்றது. குறிப்பாக, உறவுகளில் நாம் காட்ட வேண்டிய பரிவு, கனிவு, நட்பு, தியாகம் போன்றவற்றின் அடையாளமாக இதயம் இருக்கின்றது. உறவுகளில் மென்மையும், நெகிழ்வுத் தன்மையும் இருக்கவேண்டும். உறவுகளில் சட்டம் பேசக்கூடாது, நீதி, நியாயம் பேசக் கூடாது. விட்டுக்கொடுத்து, ஏற்றுக்கொண்டு, மன்னித்து வாழும் மனநிலையை இதயம் குறிக்கின்றது. இன்றைய பெருவிழாவில் இயேசு நம்மீது காட்டும் அளவற்ற பரிவுக்காக நன்றி செலுத்துவோம், அத்துடன், நமது உறவுகளில் மூளையின் ஆதிக்கத்தைக் குறைத்து, இதயத்தின் ஆளுமையை அதிகரிப்போமாக. மன்றாடுவோமாக: ஆண்டவராகிய இயேசுவே, உம்மைப் போற்றுகிறோம். எங்கள்மீது கொண்ட பேரன்பால் உமது இதயம் பற்றி எரியச் செய்தீரே. நன்றி. நாங்களும் எங்கள் உறவுகளில் பரிவு, கனிவு மிக்கவர்களாய் வாழ அருள்தாரும். ஆமென். அருள்பணி. குமார்ராஜா
''படைவீரருள் ஒருவர் இயேசுவின் விலாவை ஈட்டியால் குத்தினார். உடனே இரத்தமும் தண்ணீரும் வடிந்தன. அன்பார்ந்த இணையதள நண்பர்களே! -- யூதரின் பாஸ்கா விழா தொடங்கவிருந்த சனிக்கிழமைக்கு முந்திய நாள் இயேசு சிலுவையில் இறந்தார் என யோவான் குறிப்பிடுகிறார். இந்த நாளை நாம் ''பெரிய வெள்ளி'' என அழைக்கிறோம். ஏற்கெனவே இறந்துவிட்டிருந்த இயேசுவின் விலாவைப் படைவீரர் ஒருவர் ஈட்டியால் குத்துகிறார். அப்போது ''இரத்தமும் தண்ணீரும்'' வடிந்தன (யோவா 19:34). இதை நற்செய்தி ஆசிரியர் (அல்லது அவருக்குச் செய்தியை வழங்கியவர்) நேரில் கண்டு, சாட்சியம் கூறுகிறார். இயேசுவின் விலாவிலிருந்து, அவருடைய இதயத்திலிருந்து வழிந்தோடிய இரத்தமும் தண்ணீரும் இயேசுவின் இறுதிக் காணிக்கையாக அமைந்தன. இரத்தம் என்பது நற்கருணைக்கும், தண்ணீர் என்பது திருமுழுக்குக்கும் அடையாளம் என்னும் விளக்கம் திருச்சபையின் தொடக்க காலத்திலிருந்தே உண்டு. -- திருச்சபையின் வாழ்வுக்கு ஆதாரமாக இருப்பவை திருமுழுக்கும் நற்கருணையும் எனலாம். இயேசுவின் சாவும் உயிர்த்தெழுதலும் நமக்கு வாழ்வளிக்கும் அருளடையாளமாக மாறின. அந்த அருளடையாளத்தின் வழியாக நாம் இயேசு கிறிஸ்துவோடு புதிய வாழ்வில் இணைகின்றோம். நம்மில் உருவெடுத்து வளர்கின்ற இறை வாழ்வு நற்கருணை என்னும் ஆன்மிக உணவால் ஊக்கம் பெறுகிறது. இயேசுவின் விலாவிலிருந்து வாழ்வு பிறந்தது என்பதை நாம் மனித இனத்தின் தொடக்க கால வரலாற்றுப் பின்னணியிலும் காணலாம். அதாவது, ஆதாம் என்னும் முதல் மனிதனின் விலாவிலிருந்து தோன்றியது ஏவா. அதுபோல, புதிய ஏவா என வருகின்ற திருச்சபை இயேசுவின் விலாவிலிருந்து தோன்றுகிறது. நாம் இயேசுவின் உடலிலும் இரத்தத்திலும் பங்கேற்கிறோம்; திருமுழுக்கின் வழியாக நமது பாவங்களும் போக்கப்படுகின்றன. இவ்வாறு நற்கருணையும் திருமுழுக்கும் நம்மைக் கிறிஸ்து வழியாகக் கடவுளோடு இணைக்கின்றன. இந்தப் புதிய வாழ்வுக்கு நாம் சாட்சிகள். பிறர்முன் நாம் இயேசு பற்றிச் சான்று பகர்கின்ற வேளைகளில் நம் வார்த்தைகளை எல்லாரும் ஏற்பர் எனக் கூறவியலாது. ஆனால் நாம் சாட்சி பகர்வதில் ஒருநாளும் தளர்ந்துவிடாமல், நாம் பெற்ற அன்பு அனுபவத்தைப் பிறரோடு பகிர்ந்திட வேண்டும். மன்றாட்டு
--அருட்திரு பவுல் லியோன் வறுவேல் இயேசுவின் திரு இருதயம் அன்பார்ந்த இணையதள நண்பர்களே! இயேசுவின் திரு இதயம், அது எதையும் தாங்கும் இதயம். உன்னுடையவும் உலகின் எல்லா மக்களுடைய எல்லாச் சுமைகளையும் தாங்கும் இதயம்.உன் எல்லாச் சுமைகளையும் தாங்கும் சுமை தாங்கி அந்த இயேசுவின் திரு இதயம்.அடி தாங்கும் உள்ளம் இடி தாங்குமா என்றால், இயேசுவின் இதயம் உன் எல்லா அடியையும் இடியையும் தாங்க தயாராக இருக்கிறது."பெருஞ்சுமை சுமந்து சோர்ந்திருப்பவர்களே, எல்லாரும் என்னிடம் வாருங்கள், நான் உங்களுக்கு இளைப்பாறுதல் தருவேன்." இறைவனிடம் வந்து நம் சுமைகளை அவரிடம் இறக்கி வைத்து, இளைப்பாறுதல் என்பது நம் பொறுப்புக்ளைக்; கை கழுவிவிடுவதல்ல. மாறாக, நம்பெருஞ்சுமைகளை அவரிடம் இறக்கி வைத்து, சில சிறிய எளிய சுமையை, அழுத்தாத நுகத்தை நம் மீது ஏற்றுக்கொள்வது. இயேசு நமக்குத் தருவது ஒரு நுகம். பொதுவாக நுகம் இருவர் சுமக்கும் சுமை. இயேசு நமக்குத் தருவது நுகம் என்பதால் நம்மோடு சுமக்கும் இரண்டாது நபர் இயேசு.ஆகவே, வாழ்க்கைப் N;பாராட்டத்தில் இளைப்பாற்றி என்பது, இறைவனோடு பகிர்ந்து கொள்வதும் இறைவன் தருவதை இறைவனோடு இணைந்து சுமப்பதும் ஆகும். இயேசுவின்திரு இதயம், சோர்ந்து மனம் உடைந்து தன்னிடம் தஞ்சம் அடையும் அனைவருக்கும் புகலிடமாகி புது வாழ்வு வழங்குகிறது. இயேசுவோடு சேர்ந்து அவர் தரும் மாற்றுச் சுமையை மனமுவந்து சுமப்போம். நமக்கு நம் சுமை பெரிதாகத் தோன்றாது. சுமையாக இருக்காது. புதிய அனுபவமாக இருக்கும். வாழ்வு இனிதாக இருக்கும்.இனிது வாழ்வோம். வாழ்த்துக்கள். ஆசீர். --அருட்திரு ஜோசப் லீயோன்
:-- அருட்திரு ஜோசப் லியோன் --:
|